Ўзбекистон Республикаси Ички ишлар вазирлиги Ҳайъатининг навбатдаги мажлиси бўлиб ўтди. Унда ички ишлар идораларининг масъул ходимлари ва соҳавий хизматлари раҳбарлари иштирок этишди.  

Ҳайъат йиғилишини Ўзбекистон Республикаси Ички ишлар вазири, генерал-лейтенант Б. Матлюбов кириш сўзи билан очди ва олиб борди.

Вазир йиғилишда бу тинч-осо­йишта кунлар қадри ҳақида гапирар экан, дастлаб Президентимиз Ислом Каримовнинг Бухоро вилоятига ташрифи пайтида Қирғизистоннинг Ўш шаҳри ва Жалолобод вилоятида юз берган воқеаларга муносабат билдириб айтган:  “Фожианинг сабаблари ҳақида гапирганда, мен қонга – қон, жонга – жон деган қарашга қаршиман. Нафақат қаршиман, балки шундай фикр билан юрадиганларни халқимизнинг душмани, деб биламан. Юртимизда тинчлик ва осойишталикни асраш, қадрига етиш керак. Мен халқимизни оҚир-вазмин бўлишга, етти ўлчаб бир кесиш керак, деган нақлга ҳамиша амал қилишга яна бир бор даъват этмоқчиман. Чунки жаҳолат ҳеч қачон яхшиликка олиб келмаган. Қизиққонлик, жоҳиллик оқибатида бу гўзал ҳаётни бир лаҳзада йўқотиш мумкинлигини сира унутмаслик лозим... Бу қўпорувчиликни уюштирган кучларнинг нияти Ўзбекистонни ҳам бу қарама-қаршиликка тортишдан иборат бўлган” – деган оқилона сўзларини эслатиб ўтди.

Шу боисдан халқимизнинг тинчлик-осойишталиги учун масъул бўлган ходимларимиз бундан кейин ҳам ҳушёрликни қўлдан бой бермай, барча хизматлар бир ёқадан бош чиқариб жиноятчиликнинг барча кўринишларига қарши кескин кураш олиб боришлари зарур, – деб таъкидлади генерал-лейтенант Б. Матлюбов.

Ҳайъат раиси республика ички ишлар идораларининг 2010 йилнинг биринчи ярим йиллигидаги тезкор-хизмат фаолиятининг натижалари ҳақида гапирар экан, яқинда бўлиб ўтган Ўзбекистон Республикаси Вазирлар Маҳкамасининг мажлисида жорий йилнинг биринчи ярим йиллигида республика ижтимоий-иқтисодий ривожланиш якунлари муҳокама этилганлигига тўхталди. Жумладан, бу даврдамамлакатимизда ялпи ички маҳсулотнинг 8,0 фоизга, саноат маҳсулоти ишлаб чиқариш ҳажмининг 8,0 фоизга, истеъмол товарлари ишлаб чиқариш ҳажмининг 11,8 фоизга, қишлоқ хўжалиги маҳсулотларини етиштириш ҳажмининг 6,9 фоизга, қурилиш ишлари ҳажмининг 11,5 фоизга, чакана товар айланмаси ҳажмининг 10,9 фоизга ўсиши таъминланганини қайд этиб ўтди.

Ўзбекистон Республикаси Ички ишлар вазири, генерал-лейтенант Б. Матлюбов бу ютуқларни қўлга киритилишида мамлакатимизда давлатимиз раҳбари бошчилигида тинчлик-осойишталикнинг сақлаб қолингани муҳим аҳамият касб этганлигини таъкидлар экан, бунда барча ҳуқуқ-тартибот идоралари билан бир қаторда ички ишлар ходимларининг ҳам муносиб ҳиссалари борлигини айтиб ўтди.

 Ҳайъат йиғилишида республика Ички ишлар вазирининг биринчи ўринбосари, полковник А. Ибрагимов ички ишлар идораларининг 2010 йилнинг биринчи ярим йиллиги давомидаги тезкор хизмат фаолиятининг натижаларига тўхталди. Мамлакатимиз ички ишлар идоралари томонидан жиноятчиликка қарши кураш ишларининг аҳволи ва уни такомиллаштириш чора-тадбирларига эътибор қаратиб, ҳисобот даври мобайнида жиноятчиликка қарши кураш, жамоат тартибини сақлаш, ёнғин хавфсизлиги, фуқароларнинг тинчлигини таъминлаш, халқаро ҳамкорликни кучайтириш борасида муайян ютуқлар қўлга киритилганини таъкидлади. Шунингдек, ҳисобот даврида баъзи ички ишлар идоралари раҳбарлари томонидан бирмунча камчиликларга ҳам йўл қўйилганлигини қайд этар экан, айрим вилоятларда гиёҳвандликнинг олдини олиш, тезкор-қидирув, хизматлараро ҳамкорликни таъминлаш, жиноятчиликка, айниқса, терроризм ва диний экстремизм, уюшган жиноятчилик ва унинг бошқа турларига   қарши курашишда хизматлар ўртасидаги ҳамда жамоатчилик билан алоқаларни кучайтириш борасидаги саъй-ҳаракатлар талаб даражасида эмаслигини кўрсатиб ўтди.

Соҳавий хизматлар фаолиятида кузатилаётган бу каби сусткашликларга барҳам бериш, хизмат интизомини яхшилаш, олиб борила±тган ишларни танқидий нуқтаи назардан баҳолаш хизмат самарадорлигини янада оширишда муҳим омил бўлиши эътироф этилди.

Йиғилишда муҳокама этилган масалалар юзасидан ИИВнинг тегишли соҳавий хизматлари ҳамда жойлардаги ИИБ раҳбарларининг ҳисоботлари тингланди.

Жиноятчиликка қарши курашда сусткашликка йўл қўйган айрим вилоят, шаҳар-туман ИИБларининг тезкор-хизмат фаолиятлари йил якуни бўйича Ўайъат йиҚилишида муҳокама қилиниб, тегишли чора кўрилиши белгилаб қўйилди.  

Мажлисда кун тартибидаги иккинчи масала – республика Ички ишлар вазирлиги Ҳайъатининг иккинчи ярим йилликка мўлжалланган иш режаси тасдиқланди.

Генерал-лейтенант Б. Матлюбов ички ишлар идораларининг соҳавий хизматлари ходимлари кенг жамоатчилик билан ҳамкорликни янада мустаҳкамлашлари, профилактика дои­расидаги тадбирларнинг самарадорлигини оширишлари борасида мажлис иштирокчилари олдига аниқ вазифаларни қўйди.

– Раҳбарларнинг ўзлари ишни ташкил этиб уни назорат қила олмайдиган бўлса, ишни бошқалардан қандай талаб қилиши мумкин?! Энг аввало раҳбарларимиз ўз ишларини тубдан кўриб чиқиб, бошқаларга ўрнак бўлишлари лозим, – деб таъкидлади генерал-лейтенант Б. Матлюбов.

Шунингдек, аҳоли билан дои­мий мулоқотда бўлиб, халқ­нинг оҚирини енгил қилувчи профилактика инспекторларини ўз хизмат вазифасидан бошқа ишларга жалб этмаслик лозимлиги, улар ҳамиша халқ ичида бўлиши кераклиги таъкидланди.

 Йиғилишда вазир шунингдек, Юртбошимизнинг Ўзбе­кистон Қаллакорларига йўллаган табригида айтилганидек, бу йил азиз деҳқон ва фермерларимиз, барча дала меҳнаткашлари биргаликда 7 миллион тоннага яқин юксак ғалла хирмони бунёд этиб, Ўзбе­киситон қишлоқ хўжалиги тарихида ҳеч шубҳасиз янги саҳифа очишганини, бу халқимизнинг турмуш фаровонлиги янада яхшиланишида муҳим аҳамиятга эга эканлигини айтиб ўтди. Аммо бу ёруғ кунларимизни кўра олмайдиган, бизга ҳавас кўзи билан эмас, балки ҳасад кўзи билан қарайдиганлар ҳам борлигини таъкидлаб, барчани бу борада бедор ва ҳушёр бўлиб хизмат қилишга даъват этди.

– Мамлакатимизда ҳукм сураётган тинчлик-осойишталикни, халқимизнинг фаровон ҳаётини кўз қорачиғидек асрайлик, бир-биримизга ҳамиша меҳр-оқибатли бўлайлик, юртимизда улуғ айёмлар, дориламон кунлар давом этаверсин, – деди генерал-лейтенант Б. Матлюбов ўз сўзи якунида.  

Танқидий руҳда ўтган мажлисда ички ишлар идоралари олдида турган галдаги долзарб вазифалар белгилаб олинди ва кўриб чиқилган масалалар юзасидан тегишли қарорлар қабул қилинди.